Pimmusay ti uppat nga indibidual iti abagatan a laud ti Turkey idi laeng kalman kalpasan a naidungpar ti ambulance helicopter iti pasdek ti ospital sakbay a nag-crash daytoy iti daga.
Ti helicopter ket agtayab kuma manipud iti Mugla Training and Research Hospital, a nagluganan ti dua a piloto, maysa a doktor ken sabali pay a medical worker, sigun ti health ministry iti maysa a statement.
Kinuna ti regional governor ti Mugla a ni Idris Akbiyik nga immuna a nadungpar ti helikopter ti maikapat a kadsaaran ti pasdek ti ospital sakbay a nag-crash daytoy iti daga.
Awan ti nasugatan iti uneg ti pasdek wenno iti daga.
Iti maysa a video, maimatangan a naiwaras dagiti rugit iti aglawlaw ti ospital, ken sumagmamano nga ambulansia ken emergency teams ti adda iti nakapasamakan ti insidente.
Iti agdama, manarimaan ti imbestigasion dagiti otoridad ti rason ti aksidente a napasamak bayat ti nakaro nga ulep.
