Pinaritan ni US President Donald Trump ti tallo a dadakkel a news outlets a kas iti CNN, MS NOW ken Politico iti uneg iti White House kalpasan nga inakusaranna dagitoy iti panangipadamag iti mapapati a “fake news.”
Kinuna ni Trump nga awan ti maysa a partikular nga insidente ti nangiduron kenkuana a nangitunda iti addang ken bunga daytoy kadagiti report dagiti nasao a media outlet iti napalabas a mano a tawen.
Nupay kasta, naimatangan latta dagiti journalist iti tallo a news outlet a mangmangged iti White House idi Biernes.
Kinondenar met iti CNN ken Politico ti addang ken impettengda nga idepensada ti karbenganda iti sidong iti First Amendment iti US Constitution, a mangsalsalaknib iti press freedom.
Sigun kadagiti eksperto iti press freedom, mabalin daytoy a sumango kadagiti ligal a karit gapu iti posible a panaglabsing iti constitutional protections para iti press freedom.
