BAGUIO CITY – Nadiskobre ti nagtipon a pwersa ti pulisya ken militar ti maysa nga usok a maatap a kuta ken paglemmengan ti armas dagiti rebelde a Communist Party of the Philippines – New People’s Army (CPP-NPA) sadiay Barangay Balaoa, Tadian, Mountain Province idi kalman.
Nailanad iti report ti Regional Mobile Force Battalion 15 ti Police Regional Office Cordillera a resulta daytoy iti panagrespondeda iti naawatda nga impormasyon seknan iti maatap a kuta dagiti rebelde iti nasao a disso.
Iti Joint Army/PNP White Area Operation, nadiskobre ti nasao nga usok nga addaan ti kauneg wenno kaatiddog a duapulo a kadapan, kangato nga uppat a kadapan ken kalawa a tallo a kadapan.
Nasarakan iti uneg ti usok ti dua a mapapati nga improvised blasting machines ken dua a mapapati nga improvised anti-personnel/tank mines, no sadino, ti maysa ket agdagsen ti 4.81 kgs ken ti maysa pay ket agdagsen ti 4.13 kgs.
Patien dagiti pulis nga inabandona dagiti rebelde ti nasao a kuta, agarup tallo a bulanen ti napalabas.
Kinunada pay a no saanda a dagus a nagresponde ket posible nga ad-adu a biag ti naisebba gaputa ti nasao a kuta ken dagiti pampabettak iti daytoy ket asideg laeng iti pagtataudan ti suplay ti danum dagiti umili ti Balaoa, Tadian ken no bumtak dagiti landmines ket madanon ti kalawa nga agingga 300 a metro.
Innayon ti pulisya a ti nadiskobreda ket pammaneknek a saan a pilpilyen dagiti NPA ti puntiryada nangruna ta accessible kadagiti umili ti lokasyon ti kuta.
Gapu iti daytoy, kidkiddawen manen ti tropa ti gobyerno ti panagkaykaysa iti panagkondinar iti komunista a grupo tapnu maisardengen ti panagisaknap dagitoy iti kinaranggas.
