Pinadayawan iti Baguio General Hospital and Medical Center (BGHMC) ti utility worker a ni Agnes Ammy Lebbet kalpasan nga insublina ti P100,000 a nabati iti maysa a pasiente iti kwarto iti ospital kalpasan a na-discharge.
Nasarakan ni Lebbet ti kuwarta bayat nga agdaldalus ti maysa a pediatric private room iti Flavier Building. Kalpasan a naimatanganna ti bundle iti sag-P1,000 a kuwarta nga addaan iti bank stamp nga aggatad iti P100,000, dagos a sinapulna ti pasiente ken ina daytoy iti lobby ken personal nga insublina ti kuwarta.
Nagyaman ti ina iti pasiente ken iti kinabigatanna ket simmarungkar iti pagtaengan ni Lebbet tapno mangipaay iti bagas ken nateng kas panagyaman.
Sigun kenni Lebbet, saannna a pinanunot nga alaen ti kuwarta iti tengga iti pinansial a kinarigat.
Kinunana a kasapulan nga isubli nu saan a kukua.
Gapu iti kinapudnona, nairekomendar ni Lebbet para iti “Bida Ka Kapamilya” rewards and recognition program iti ospital.
Sumagmamano nga aldaw sakbay ti insidente, insublina manen ti maysa a pitaka a nasarakanna iti Pediatric Conference Room.
Sigun iti dadaulo iti BGHMC, iparparang ni Lebbet dagiti kangrunaan a panangipateg iti institusion a kas iti kinapudno, responsiblity, ken panangtaripato iti dadduma.
