BAGUIO CITY – Ad-adda pay nga irtengan ti provincial government ti Benguet ti information campaign daytoy tapnu maallukoy dagiti ad-adu pay a tattao ti probinsia nga agpabakuna kontra iti COVID-19.
Sigun kenni Governor Melchor Diclas, agarup ita iti 50 percent ti vaccination acceptance rate kadagiti umili ti Benguet.
Nupay kasta, kinunana a kasapulan ti ad-adda pay a panagkumbinsir wenno panag-allukoy tapnu madanun ti 90 percent a vaccination acceptance rate iti benneg dagiti umili a kwalipikado a mabakunaan.
Dinakamatna a makikoordinar ti provincial government kadagiti medical organizations kas kadagiti medical technologists ken Philippine Nurses Association tapnu tumulong dagitoy iti panakaiwaras dagiti benipisyo ti panagpabakuna kontra iti COVID-19.
Immapela pay daytoy kadagiti health workers a nagpabakunan kontra iti COVID-19 tapnu agserbid a modelo tapnu manayonan ti lebel ti panag-akseptar kadagiti umili iti bakuna kontra iti COVID-19.
Naamuan a video documentation a nakaitampokan dagiti nakalasat manipud iti COVID-19 ti maysa kadagiti istratehiya ti provincial government tapnu mangngegan dagiti umili ti first hand information seknan iti COVID-19 nangruna ta adda pay dagiti saan a mamati a pudno ti nasao a sakit.
