BAGUIO CITY – Nangrugin ti vaccination caravan nga isaysayangkat ti Benguet Provincial Health Office kadagiti babbarangay kagiddan ti panakarambak ti 121st Benguet Foundation Day babaen ti Adivay.
Puntirya ti caravan ti naparpartak a panagbakuna kontra iti COVID-19 ken manayonan ti bilang dagiti mabakunaan nga umili ti Benguet.
Sigun iti gobernador ti probinsia, napagnunumuan dagiti lokal a gobyerno ti nasao nga addang para iti kanayonan a vaccination sites kaggidan ti panagsangpet ti adu a supply ti bakuna kontra iti COVID-19 partikular ti Pfizer.
Kinunana pay nga ipangrunada ti La Trinidad a pakaisayangkatan ti vaccination caravan gaputa daytoy ti munisipyo a kangatoan iti bilang ti populasyon.
Panggepda a mabakunaan ti 98,00 nga indibidual manipod iti 330,000 a puntirya ti probinsia tapnu maragpat ti 70% herd immunity ti Benguet.
Mangnamnama pay daytoy a maragpat ti probinsia ti herd immunity inton sumaruno a bulan ti Disyembre.
Kabayatanna, manamnama pay nga adda dagiti fully vaccinated a mapagasatan a mapili para iti libre a panagpasyar kadagiti mapili a pagpasyaran iti probinsia.
Paset met daytoy ti panangitaltal-o ti turismo ti probinsia ken panagguyugoy kadagiti umili nga agpabakuna kontra iti COVID-19.
Inyunay-unay ti LGU a paset paylaeng daytoy iti panangital-oda iti turismo ti probinsya ken tapnu mangguyugoy pay kadagiti umili nga agpabakuna.
