BAGUIO CITY – Nababa paylaeng ti vaccination rate wenno bilang dagiti umili a nabakunaan kontra iti COVID-19 iti tallo a probinsia ti rehion Cordillera.
Sigun kenni Dr. Anachris Kilakil, dadaulo ti Regional Vaccination Operations Center ti DOH-Cordillera, dagitoy ket dagiti probinsiya ti Ifugao, Kalinga ken Benguet.
Maibasar iti kaudian a datus dagitoy, dumanon laeng iti nasurok 75,900 nga indbidual ti nabakunaan kontra iti COVID-19 sadiay Benguet bayat a nasurok laeng iti 29,700 sadiay Ifugao ken nasurok 73,300 sadiay Kalinga.
Dinakamatna a ngimmato metten iti 40% ti vaccination rate dagiti probinsia ti Abra, Apayao ken Mountain Province.
Inlawlawag ni Dr. Kilakil a karaman kadagiti rason iti panagkedked dagiti umili nga agpabakuna ket ti panamati dagitoy kadagiti peke a damag mainaig iti COVID vaccine ken ti kaawan ti panagtalek wenno panakakumbinsir dagitoy iti napintas nga epekto ti bakuna kontra iti COVID-19.
Dinakamatna pay a maysa pay a rason ti kaadayo wenno kasulinek dagiti lugar iti rehion nupay adu ti bakuna a mailatlatang para kadagiti umili kadagiti nasao a lugar.
Nupay kasta, imbinglayna nga ar-aramiden amin dagiti healthcare workers dagiti kabaelan dagitoy tapnu madanun dagiti nasao a lugar tapnu mabakunaan dagiti agindeg kadagitoy kontra iti COVID-19.
