BAGUIO CITY – Rumrumwar iti assessment a vaccine hesitancy wenno panagkedked gapu iti agbalin a side effects ti bakuna ti maysa a rason iti nababa a vaccination rate ti La Trinidad, Benguet.
Sigun kenni La Trinidad Municipal Health Officer Dr. Antonette Agpas, nababa ita ti bilang dagiti nabakunaan sadiay a dumanon laeng iti 46% a katukad ti nasurok 45,000 nga indibidual.
Kinunana nga adayo a nababa daytoy no idilig iti puntiryada a panakabakuna ti 70% wenno 98,000 a populasyon ti La Trinidad iti panagleppas ti agdama a tawen.
Dinakamatna nga adu dagiti vaccination sites ti ili ken adda pay ti panagbakuna kontra iti COVID-19 a maisaysayangkat kadagiti babbarangay sadiay.
Inaklonna a dakkel a karit kadakuada ti vaccine hesitancy dagiti umili gaputa adda pay ti nabatbati a 53,000 nga indibidual a nasken a mabakunaan agingga iti ngudo ti agdama a bulan ti Nobyembre.
Sigun kenkuana, nasken a makabakunada iti 17,000 nga indibidual iti linawas a katukad ti 3,534 nga indibidual iti innaldaw.
Impettengna pay a saanen a parikot ti kaadayo ti vaccination site gaputa ti opisinada a mismo ti mangdandanon ita kadagiti residente ken umdas metten ti suplay ti bakuna kontra iti COVID-19 a maaw-awat ti munispyo.
Maipalagip a ti Benguet, Ifugao ken Kalinga dagiti probinsia iti Cordillera a nabigbig nga addaan ti agtaltalinaed a nababa a vaccination rate wenno bilang dagiti umili a nabakunaan kontra iti COVID-19.
