BAGUIO CITY – Naituding a maibiyahe dagiti Vote Counting Machines (VCMs) ken dadduma nga eleection paraphernalia kadagiti nagduduma nga ili iti probinsia ti Benguet inton May 8-10 para iti maipatungpal a Final Testing and Sealing sakbay ti May 13, 2019 midterm elections.
Sigun kenni Benguet Provincial Election Supervisor Atty. Nicasio Jacob, agtaud dagiti VCMs iti COMELEC hub sadiay PEZA Compound, Loakan, Baguio City.
Kinunana a nasapa a maideliver dagiti VCMs iti munisipyo ti Kibungan inton May 8 gapu iti kaadayo dagiti pagbotosan iti nasao nga ili bayat a dagiti dadduma nga ili ket inton Mayo 9-10.
Inlawlawagna a dagus a maibiyahe dagiti VCMs kadagiti nagduduma a polling centers apaman a makagteng daytoy iti maseknan a munisipyo.
Innayonna nga awan met ti dakkel a karit wenno makitkitada a parikot iti panakaibiyahe dagiti VCMs malaksid iti posible a panagbaliw iti sasaaden ti panawen nangruna no agtudo kadagiti nasao nga aldaw.
Sigun pay kenni Atty. Jacob, addan ti koordinasyonda kadagiti pulis para iti panakaibunag dagiti VCMs ken dadduma nga election paraphernalia kadagiti maseknan a munisipyo iti Benguet.
Kabayatanna, inlawlawagna a maipaay laeng dagiti maaramat nga official ballots kadagiti voting centers inton Mayo 12 wenno iti mismo nga aldaw ti eleksyon kas maibasar iti baro a resolusyon ti komisyon.
