BAGUIO CITY – Nakemmeg ti maysa a lalaki gapu iti panangdangranna iti maysa a babae ken iti panagpaputokna iti paltog sadiay Shamolog, Pico, La Trinidad, Benguet idi kanikadua.
Nabigbig daytoy a ni as William Destor Lisada, 37-anyos, vegetable packer, tubo ti Cabanatuan City ken agab-abang iti balay ti biktima a nabigbig met a ni Jessica Balag-ey, 33-anyos ken residente iti Shamolog, La Trinidad.
Maibasar iti report, nagawid ti biktima manipud iti tersena ken sadiay a nadanonna ti suspek iti uneg ti silidda nga agasawa.
Kinomprontar ti biktima ti suspek ngem killaat a dinanog ti suspek ti rupa ti biktima sakbay a binekkelna daytoy.
Limmaban ti biktima agingga a timmaray iti ruar ti balay ti suspek ken sadiay a nagpaputok iti paltog iti saan a masinunuo a direksion.
Dagus a nagresponde dagiti pulis ken sadiay a kinemmegda ti suspek ken kinumpiskarda ti inaramatna ng improvised firearm wenno sumpak ken siyam a bala ti shot gun.
Narekober met manipud iti ab-abangan a kwarto ti suspek ti wallet ti biktima a naglaon ti kwarta ken nagduduma nga ID.
