Agraraira ita ti kaso dagiti marenrentaan a lugan a saanen maisubsubli kadagiti agtagikua.
Iti panakiuman ti Bombo Radyo kenni Police Executive Master Sergeant Constancio Balilis ti Police Highway Patrol Team- Benguet, maysa daytoy a modus ti vehicle scam nu sadino,kadawyan a mangar-aramid dagiti suspek ti peke a dokumento ti lugan kas ti OR-CR tapno maisalda wenno mailakoda dagitoy kadagiti puntiryada a pangilakuan.
Sigun keni Balilis, dumanunen iti sangapulo a units ti naimpound dagitoy agingga iti agdama nu sadino, nagtaud dagitoy iti nagduduma a rehion iti pagilian.
Inlawlawag ti opisyal a madukduktalanda ti kaadda dagiti luglugan nga iligal a nailako nu iberipikarda ti dokumento nga iggem dagiti agtagikua kadagitoy a tiltiliwenda gapu iti sabali pay a panaglabsing dagitoy iti reglamento ti transportasyon wenno iti kalsada.
Gapu iti dayta, nagpalagip ni Balilis kadagiti addaan panggep a gumatang ti second hand wenno pre-owned a lugan nga iberipikar dagitoy dagiti kaskenan a dokumento sakbayda a gatangen.
Kasta met a mapalpalagipan dagiti agparparenta ti lugan a masapol a dagiti laeng am-ammoda ti pangitalekanda kadagitoy.
Kaspangarigan saanda a maliklikan ti agparenta kadagiti saanda nga am-ammo, insingasing ni Balilis a nasaysayaat nu alaenda ti pakabigbigan dagitoy, ken mangaramidda ti kasuratan nga addaan ti notaryo.
Kabayatanna, maibasar iti datos ti nasao nga opisina, umad-ado ti kaso rent a car modus iti agdama a tawen.//Bombo Rob Dominguez
