BAGUIO CITY – Sumangsango iti kaso a grave threat ti maysa a vendor kalpasan a ginandatna a dangran ti maysa a personnel ti Peace and Order Safety Division (POSD) sadiay Kayang-Hilltop ditoy siudad ti Baguio idi kalman.
Nabigbig ti biktima a ni Erick Tugana, 49-anyos, POSD personnel, tubo ken residente ti Asin Road, Baguio City bayat a nabigbig ti suspek a ni Juanito Feria Payomo, 34-anyos, vendor, tubo ti Santiago, Isabela ken residente ti Irisan, Baguio City.
Maibasar iti imbestigasyon ti pulisya, agtaktakder ti biktima iti sidewalk sadiay Kayang-Hilltop ken ur-urayenna a sumardeng ti tudo.
Inasitgan ti suspek a nakaiggem iti kutsilyo ti biktima ken dinamagna no ayan dagiti POSD personnel a nangidadanes kenkuana.
Gapu met iti buteng ti biktima a bagsolen daytoy ti suspek ket immatreas ken immadayo.
Nupay kasta, kinamat ti suspek ti biktima agingga iti First Kayang Street.
Nagpaarayat ti biktima kadagiti pulis a mangipatpatungpal sadiay iti Oplan Bakal Sita a nangitunda iti panangkemmegda iti suspek.
Narekober pay manipud iti suspek ti imet daytoy a kutsilyo nga addaan kaatiddog a nasurok maysa a kadapan.
