BAGUIO CITY – Maisagsaganan ti kaso a maipila kontra iti maysa a lalaki kalpasan a pinapatayna ti maysa a vendor sadiay Brgy. Bangbangar, Bangued, Abra itay parbangon.
Biktima iti nasao nga insidente ni Jake Villanueva Borce, 28-anyos, vendor ken residente ti Bangbangar, Bangued, Abra.
Dagus met a nakemmeg ti suspek a ni John Paul Bulos alyas “Suba”, residente ti Zone 6, Bangued, Abra.
Maibasar iti inisyal a report ti pulisya, sinabat ti biktima ti suspek tapno isublina ti bag daytoy ngem killaat a pinaltogan daytoy ti suspek.
Nagsagrap ti biktima iti walo a tama ti paltog iti barukongna.
Dagus met a naitaray daytoy iti ospital ngem naideklara a dead-on arrival.
Naala iti crime scene ti maysa a pidaso ti plastic wad ti 12-gauge shotgun.
Am-amuen ita dagiti otoridad ti motibo ti suspek iti nasao a krimen.
