BAGUIO CITY – Kasapulan a makonsulta manen dagiti vendors iti Burnham Park seknan iti panakaipaay ti pwesto a paglakuan dagitoy.
Iti interview ti Bombo Radyo Baguio, kinuna ni Councilor Philian Louise Weygan-Allan, chairman ti Committee on Market, Trade and Commerce, and Agriculture iti lokal a konseho a daytoy ket kalpasan nga awan ti aniaman a development iti nasao a proyekto.
Sigun kenkuana, addan ken nakasaganan a maipaluspos ti pondo manipud iti DOLE para iti nasao a proyekto nupay saan pay a naaprobaran iti lokal a konseho ti pondo a batang ti lokal a gobyerno ti Baguio.
Dinakamatna a saan pay a naipa-bid ken saan pay a narugian ti konstruksion dagiti nasao a pwesto gaputa adda dagiti vendors a nagriri.
Naamuan a 100 dagiti vendors sadiay Burnham Park ngem 94 laeng ti maikkan ti pwesto.
Inlawlawag ti konsehal a daytoy ket gaputa ti lako dagiti saan a naipaayan iti pwesto ket masarakan iti merkado publiko.
Sigun pay kenkuana, adda ti pagalagadan a dagiti produkto iti merkado publiko ket saan a mabalin a mailako kadagiti maibangon a pwesto.
