Pimmusay ti vice mayor ti Maguindanao del Sur kasta met ti maysa a security aide daytoy kalpasan ti panaka-ambushda idi kalman.
Maibasar iti report, nakalugan ni South Upi Vice Mayor Roldan Benito, ti miyembro ti pamilya daytoy ken dagiti security personnelna iti pick-up truck nga agdaldalyasat iti kabambantayan idi kellaat a napatayaban dagitoy iti bala a nagitunda iti ipupusay ti vice mayor ken ti security aide.
Ti asawa, annak ken maysa pay a bodyguard dagitoy ket nadangran.
Manarimaan met ti imbestigasyon, manhunt, clearing ken pursuit operation dagiti otoridad para iti panakaarestar dagiti suspek.
Kabayatanna, kinondenar ni South Upi Mayor Reynalbert Insular ti napasamak a panaka-ambush ti vice mayor ti nasao a lugar bayat nga impeksana a makikokoordinar ti lokal a gobyerno dagitoy para iti naparpartak a panakaipatungpal ti imbestigasyon.
