BAGUIO CITY – Agtultuloy ti panagbiruk iti mapukpukaw a bise mayor ti Tinoc, Ifugao kalpasan a saanen a nagaw-awid idi pay Biyernes, July 19 manipud nagturong sadiay Benguet.
Iti panakiyuman ti Bombo Radyo kenni Police Master Sergeant Allan Andrade, hepe ti Tinoc Municipal Police Station, kinunana a nagturong ni Vice Mayor Fernando Gapuz sadiay Abatan, Bugias, Benguet para iti official business.
Kinunana a naglugan ti bise mayor iti maysa a parapasahero a bus iti agarup alas-siete ti agsapa ti July 19 ken bimmaba sadiay Abatan, Buguias ngem saanen daytoy a nakita agingga ita.
Dagus a nakikoordinar ti Tinoc PNP iti lokal a gobyerno ken iti pulisya ti Abatan, Buguias ken nakita iti video footage ti CCTV camera a nagturong ni Gapuz iti direksiyon a paturong sadiay Mankayan, Benguet.
Naudi a nakita ni Gapuz a nakasuot iti brown leather jacket, green polo shirt, brown slip-on sandal, dark yellow shawl ken brown pants.
Ti 56-anyos a ni Gapuz ket agtayag ti 5’5″ ken addaan kalkalainganna a kadakkel ti pammagi.
Umap-apela met ti Tinoc PNP iti publiko a no adda ti ammoda nga impormasyon wenno no ammoda ti ayan ti bise mayor tapnu dagus nga ipaka-ammoda wenno ireportda iti istasyon ti pulisya (0935-110-7168) para iti panakasarak ti mapukpukaw a bise mayor.
