Impeksa ni Vice President Sara Duterte a nakasagana ti opisina daytoy a mangsango kadagiti impeachment case a naipila kontra kenkuana.
Sigun kenni Duterte, tunggal kaso a naipila ket adda ti abogado a mang-iggem iti daytoy.
Kinuna pay nga impasigurado ni sigud a President Rodrigo Duterte ti panangipatulodna iti kwarta a maaramat para kadagiti abogado ngem kinuna ni Sara Duterte a saan a kasapulan gapu ta naisaganaanda daytoy.
Kabayatanna, impaganetget ti bise presidente ti pagsasao a “Respect begets respect,” nu sadino nu kayatda a marespeto dagitoy ket nasken a respetoenda pay ti Office of the Vice President.
Inlawlawagna pay a saan daytoy nga agsunsungbat kadagiti damag ti house of representatives maipapan iti panakaaramat ti confidential fundsna gapu ta saan a dagitoy ti adda jurisdictionna iti nasao a banag nu di ket ti Commission on Audit.
Inyunay-unayna pay a rumbeng a saan laeng a maysa nga opisina ti targetda gapu ta mangipasimudaag daytoy kas political attack.
