Impetteng ni Vice President Sara Duterte awan ti panggep daytoy nga aglemmeng iti baet ti mapapati a saan a patas nga imbestigasyon ti National Bureau of Investigation seknan iti pangta daytoy iti presidente.
Sigun kenkuana, patienna a saan a patas ti nasao nga imbestigasyon agsipud ta patienna metlaeng nga iti damu paylaeng ket napagdesisyonanda a mangipila iti kaso kontra kenkuana.
Nupay kasta, kinunana a saanna a panawan ti Pilipinas wenno saan nga aglemmeng daytoy iti baet a maipaayan iti warrant of arrest.
Kinunana nga adda dagiti annakna rason a no maibalud man daytoy ket kayatna a makita dagitoy.
Innayonna pay nga ileppasna ti terminona agsipud ta daytoy ti kontratana kadagiti Pilipino ken inakseptarna no ania man ti plano ti Namarsua kenkuana.
