Imbagak iti regional office nga awan ti multa wenno penalty a maipataw iti mannursuro idiay Metro Manila a nag-viral itay laeng nabiit.
Daytoy ti kinuna ni Vice President ken Education Secretary Sara Duterte.
Binalakadan pay ti bise presidente ti nasao a mannursuro nga isardengna paylaeng ti klase nu makapungtot daytoy ken ituloyna manen ti klase nu maikkat ti pungtotna.
Sigun iti Education Secretary, nangegna ti pammalawag ti mannursuro nu sadino sigun iti daytoy ket saanna nga ammo a naka-live gayam daytoy iti social media idi nakapungtot iti uneg ti klase.
Impeksa ni Duterte a tao laeng ti mannursuro a makapungtot nu maibus ti pasensiyana nangruna nu ado ti estudyantena a naskenna a bagbagaan.
Maipalagip nga itay nabiit ket nagviral ti video ti mannursuro kalpasan a nangibalikas ti saan a nasayaat a sasao kadagiti estudyantena bayat a naka-live iti social media.
Dagitoy dagiti sumagmamano a sao a naibalikas ti mannursuro.
“Hindi niyo kami binabayaran dito para gawin niyong katatawanan!”
“Hindi ako nag-board exam para hindi irespeto ng mga katulad niyong wala pang nararating sa buhay!”
Sakbay nga inwaragawag ni Duterte a saan a mamulta ti nasao a mannursuro ket nangipaulog ti Department of Education (DepEd) idi Lunes ti show cause order kontra iti nasao a manursuro.
