Inlawlawag ti Tuba Municipal Police Station a ti viral video ti motorcycle accident idiay Tuba Benguet partikular sadiay Kennon Road a mangipakpakita iti maysa a rider a nadangran ken nakasanggir iti igid ti kalsada ket napasamak idi pay Enero dise nuebe, iti agdama a tawen.
Iti panakiuman ti Bombo Radyo iti Tuba Municipal Police Station, daytoy nga aksidente ket kumpirmado a napasamak idi enero dise nuebe ken nirespondeanda daytoy a dagus ken naitaray iti ospital ti biktima.
Nupay kasta, nagkedked ti nasao a biktima a mangireport wenno mangi- blotter iti daytoy gapu ta self accident ti napasamak.
Maipalagip a saan laeng a daytoy ti umuna a daras a nagkedkedked dagiti indibidual nga involve ti aksidente a maireport dagitoy no diket namin-adun a daras, nangruna no self accident daytoy.
Ti viral video ket nakaawat kadagiti nagduduma a reaksyon ken komento, ngem awan ti pagdanagan dagiti netizens wenno dagiti nakabuya gapu ta dagus met a naireport daytoy kadagiti pulisya.
Kabayatanna, inlawlawag met ti nangipablaak iti nasao a video a saana kayat a sawen a binuybuya ken inaramidna a content ti nasao nga aksidente gapu ta nabilin dagitoy a saanda a garawen ti nasao a rider a naaksidente gapu ta delikado ken dagiti professional wenno addaan kapadasan iti first aid ti rumbeng laeng a manggaraw.
Gapu iti dayta, nagpalagip manen dagiti otoridad iti kanayun a panagannad dagiti motorista nangruna nu addada kadagiti saan a familiar a dalan, kurbada ken dadduma pay.
Malaksid iti dayta, nagpalagip pay dagitoy a sakbay nga agbyahe wenno agpataray ti maysa a driver ket icheck paylaeng dagiti makina wenno kondisyon ti lugan wenno motor ken kasta metlaeng ti kondisyon ti bukod a bagi tapno maliklikan ti kapada nga aksidente.//Bombo Noveh Organo
