Nailaylayon ti visa dagiti Filipino Caregivers nga agtartaigagay nga ituloy ti trabahoda kalpasan ti pilot program para kadagiti employer sadiay Seoul, South Korea.
Iti interview ti Bombo Radyo kenni Ruel Toquero-Bombo International News Correspondent sadiay South Korea, kinunana a gapu iti daytoy ket nailaylayon iti tallo a tawen ti visa dagiti Filipino caregivers iti nasao a pagilian imbes nga agleppas ita a bulan.
Sigun kenkuana, nailaylayon paylaeng daytoy gapu ta mapnek dagiti employers iti trabaho dagiti Pilipino sadiay.
Nupay kasta, dadduma kadagiti caregivers ti mangpangpanggep nga agsubli iti Pilipinas gapu paylaeng iti nagduduma a rason kas iti saan a pannakasurot ti nailanad a sweldo dagitoy iti pinirmaanda a kontrata, ti nangato a presyo dagiti gagatangen sadiay, ken dadduma pay.
Kabayatanna, innayon pay ni Toquero, a pangpanggepen ti South Korea nga aghire iti kanayunan a caregivers manipud Vietnam, Indonesia, Cambodia, Nepal ken dadduma pay a pagilian.
