Naitantan ti voter registration para iti Barangay and Sangguniang Kabataan Elections iti maudi a lawas iti October 2025 a sigud a naituding iti July 1 agingga July 11.
Iti panakiuman iti Bombo Radyo kenni Atty. John Paul Martin, election officer iti Commission on Elections-Baguio, ti panakaitantan ti voter registration ket maitunos iti pammilin nga impaiyulog iti central office iti poll body kagiddan ti maisaksakad a gakat seknan iti panakailaylayon iti termino dagiti opisyales iti barangay iti agingga uppat a tawen.
Sigun kenni Atty.Martin, maur-uray laengin ti pangngeddeng wenno pirma ni President Ferdinand Marcos Jr. iti nasao a gakat nga immunan a nagnumwan iti Senado ken iti Kamara.
Iti kanito a pirmaan ni President Marcos Jr. ti gakat, maangay ti Barangay ken Sangguniang Kabataan Elections inton November 2026, maitantan metlaeng manipod iti naituding a panakaangay daytoy inton December 2025.
Kaspangarigan saan a patgan ni President Marcos Jr. daytoy, kinuna ni Atty. Martin a matuloy ti eleksyon inton December 2025.
Gapu iti dayta, inlawlawag ti opisyal a kasapulan a saan nga agpakampante gapu ta saan pay a sigurado nu maitantan a talaga ti 2025 Barangay ken Sangguniang Kabataan Elections.//Bombo Rob Dominguez
