Indepensa ni VP Sara Duterte ni Senador Ronald dela Rosa kagiddan iti kumarkaro a tension iti Senado idi Miyerkules.
Manipud The Hague, kinuna ni Duterte a nakalkaldaang ken makapungtot ti imbagana a kinaawan panagraem iti institusion ti Senado.
Impaganetgetna nga awan ti direkta a hurisdiksion iti Pilipinas kadagiti foreign court ken tribunal malaksid nu bigbigen daytoy dagiti lokal a korte.
Sigun kenni VP Duterte, mabalin a malabsing ti constitutional rights ni Senador Dela Rosa nu maipatungpal a dagos dagiti pagalagadan manipod iti dadduma a pagilian.
Inawagan metlaeng iti bise presidente kas “extraordinary rendition” ken saan a “surrender” ti panangiyakar kenni sigud a President Rodrigo Duterte iti foreign authorities.
Sigun kenni VP Duterte, naamuan ti sigud a presidente ti tension iti Senado babaen kadagiti report iti telebisyon.
Kinunana metlaeng a nakasaritana ni Senador Dela Rosa idi napalabas nga aldaw ken agtultuloy a makikikoordinar kadagiti kaalyadoda iti Senado tapno mangipaay iti suporta.
Kabayatanna, nagkedked paylaeng daytoy a mangipaay iti detalye seknan iti impeachment complaint kontra kenkuana ken kinunana a ti legal ken impeachment team daytoy ti nangigem iti nasao nga isyu.
