Dumanon iti walo a Filipino-American iti karaman kadagiti agngayangay iti nagduduma a posision idiay Amerika iti maipatungpal a presidential elections ita a Nobiembre a singko.
Maysa kadagitoy ti agtaray kas senador, ken dua met iti kina-mayor.
Ni Steven Raga, kayatna manen nga agtugaw iti maysa pay a termino kas New York State Assemblymember tapno mangibagi iti District 30 idiay Queens, New York.
Agngayangay met iti California Assembly ni Jessica Calazo, sigud a Chief of Staff ni California first Attorney General Rob Bonta.
Namnamaen met ni Ysabel Jurado a maipatugaw iti City Council ti Los Angeles County.
Puesto met iti Wisconsin State Assembly ti puntiria ni Angelito Tenorio.
Bayat a kayat met ti Filipino-Amerikan a ni Todd Gloria nga agbalin a mayor iti San Diego, California.
Ni Juslyn Manalo, agtaray para iti maikauda a terminona kas mayor ti Daly City.
Makibalubal met iti puesto ni Christopher Cabaldon para iti kinasenador iti California State.
Kabayatanna, nagleppasen ti nasapa a panagbotos a nagbalin a nababa ti bilang dagiti nagbotos nu idilig iti 2020 election idi abaken ni Joe Biden ti incumbent president idi a ni Donald Trump.
Ti agdama a Unites States Vice President a ni Kamala Harris ti kalaban ni sigud a United States President Donald Trump iti kinapresidente.
Maibasar iti Vote.org, nasurok 72 milion a botante ti nakipaset iti early voting iti agdama a panagbotos.
Idiay New York City, dumanon iti 2 milion ti nagbotos, a nababbaba iti 8.6 milion idi 2020.
Nagleppas ti early voting idi kalman, ken mangrugi ti pormal a panagbotos iti Election Day iti Nobiembre a singko, petsa idiay Amerika.
Manamnama nga agbalin a “nadikket” ti laban da Donald Trump ken Kamala Harris gaputa awan iti rumrumuar a nalawag a nangabak kas maibasar iti naipablaak a survey.
