BAGUIO CITY – Boluntaryo a nagsumitir ni Cordillera Peoples Alliance (CPA) chairperson Windel Bolinget iti opisina ti National Bureau of Investigation (NBI) idi kalman.
Maibasar iti statement nga inruar ti CPA, para daytoy iti seguridad ni Bolinget bayat ti panangpaneknekna iti kina-inosentena manipud iti kaso nga impila ti pulisya kontra kenkuana.
Sigun iti grupo, ti panagparang ni Bolinget sadiay NBI ket saan a kaipapanan ti panagsukona wenno panangaklonna iti nasao a kaso.
Kinuna ti grupo a ti inaramid ni Bolinget ket tapnu maaddaan daytoy iti ‘full access’ kadagiti amin a legal services iti panangsangona iti nasao a kaso bayat nga adda iti sidong ti protective custody ti NBI.
Impeksada pay ti panakaipaay ti amin a karbengan ni Bolinget bayat ti panagbalin daytoy a detainee iti NBI ken pasungbatenda ti gobyerno iti kanito nga adda ti dakes a mapasamak iti dadaulo ti CPA kabayatan ti kaadda daytoy iti proteksion ti NBI.
Immuna iti daytoy, inruar ti Cordillera Police ti paka-ammo a mangkidkiddaw iti tulong ti asinoman a makaipaay ti impormasyon a mangitunda iti panakakemmeg ni Bolinget gapu iti kaso daytoy a murder ken magungunaan iti P100,000 ti asinoman a makaipaay ti nasao nga impormasyon.
