Naglusulos ti warden ti pagbaludan iti Bureau of Immigration (BI) kalpasan ti akusasyon ti Russian Vlogger a ni Vitaly Zdorovetsky a mapaspasamak ti korapsyon iti uneg ti nasao a pasilidad.
Iti video ni Vitaly, kinunana nga iggemna ti mobile phone daytoy bayat a nagtalinaed iti nasao a pagbaludan nu sadino, dinakamatna pay nga iwaragawagna ti korapsyon kas iti maatap a panangbayadna iti jail guard tapno maala ti mobile phone na.
Innayonna pay nga adda ti bileg ti kwarta ditoy Pilipinas nu sadino,maaramid mo amin babaen iti daytoy.
Sigun kenni Palace Press Officer Undersecretary Atty. Claire Castro, nakapatangda a mismo dagiti maseknan nga opisyales iti Bureau of Imigration(BI) nu sadino,inlawlawagda metlaeng a ti panangipaayda iti mobile phone ti Russian Vlogger ket tapno makatungtongna laeng ti pamilyana.
Nupay kasta,kinuna ni Atty.Castro a panaglabsing iti pagannurutan ti inaramid ni Vitaly a panag-vlog iti uneg ti pagbaludan rason nga impettengna nga imbilin ni President Ferdinand Marcos Jr. ti naan-anay nga imbestigasyon iti daytoy.
Maipalagip a ni Vitaly ket inarestar dagiti kameng iti Bureau of Immigration (BI) idi April 2025 kalpasan a nagviral ti kontent nga impablaakna iti social media page daytoy a naranggas ken makapasair kontra kadagiti Pilipino.
Naipasidong daytoy iti kustodiya iti Bureau of Jail Management and Penology (BJMP) sakbay a naiyakar iti detention faility iti Bureau of Immigration (BI).
Idi laeng January 17, naideport daytoy iti pagilian a nagtaudanna.
Kabayatanna, posible met a pilaan dagiti otoridad iti kaso ti maseknan a warden apaman a maaddaanda iti umdas nga ebidensya kontra iti daytoy kasta metten dagiti daduma pay nga empleyado ti pagbaludan nga immunan a nasuspindir.
