IGOROT AXE | Insubli ti gobyerno ti Australia ti cultural artifact a mid-20th century axe a naar-aramat iti panagkitikit ti kayo ken panag-anop sadiay probinsia ti Ifugao.
Iti maysa a seremonya, impaima ni Acting First Assistant Secretary Greg Cox manipud iti Office for the Arts ti Australian Government ti nasao a banag nga inawat met ni Philippine Ambassador to Australia H.E. Ma. Hellen B. De La Vega.
Iti statement ti Philippine Embassy sadiay Australia, ti wasay ket na-intercept dagiti Australian Border Force (ABF) apaman a naiserrek daytoy sadiay Australia manipud sadiay United States.
Ti panakaisubli ti nasao a wasay ditoy Pilipinas ket maitunos iti Republic Act 10066 wenno ti Philippines’ Heritage Law.
Pinagyamanan met ni Ambassador De La Vega ti gobyerno ti Australia iti panangisublida iti Pilipinas iti napateg a cultural artifact.
Innayonna a ti agdama a tawen 2021 ti Year of Filipino Pre-Colonial Ancestors.
Innayonna nga agpada nga addaan ti Pilipinas ken Australia iti nabaknang a nainsigudan a tawid nga agtultuloy a mangigigiya ken mangim-impluwensia kadagiti umili ken iti masakbayan ti dua a pagilian.
Maramrambakan ti 75 a tawen a diplomatic relations ti Pilipinas ken Australia ita a tawen.
