Agtultuloy pay agingga iti agdama ti panagramaram iti uram idiay Los Angeles, California nu sadino, lima nga indibidwalen ti nakumpirmar a pimmusay.
Iti panakiuman iti Bombo Radyo kenni Delfrado Villanueva Jr., Bombo International News Correspondent idiay California, USA, kinunana nga inaprubaranen ni US President Joe Biden ti Major Disaster Declaration.
Sigun kenni Villanueva, malaksid a mapagparparikutan ti uram ken dagiti residente a maap-apektaran, agtataud metlaeng a pakaseknan dagiti agtatakaw a manggungundaway iti agdama a sitwasyon.
Gapu iti dayta, malaksid met iti panagresponde dagiti otoridad, maigidgiddan ti panagpalagipda iti publiko seknan iti panagridam dagitoy.
Maysa pay kadagiti agtataud manen a problema ti saan a nasayaat a kalidad iti angin a malanglang-ab ita dagiti residente saan laeng nga idiay Los Angeles nu di ket kadagiti kabangibang pay a lugar gapu iti agtultuloy a panagramaram iti uram.
Iti agdama ket karamanen a maur-uram ti paset ti Hollywood Hills, maysa a nalatak a disso nga adda pakainaiganna iti American film industry nu sadino, sumagmamano nga Hollywood Celebrities ti mapukpukawanen iti pagtaengan.
Dumanon metten iti ginasgasut a ribo nga indibidwal ti naipasidong iti mandatory evacuation.//Bombo Rob Dominguez
