Gapu iti ayatna nga adda ti maka-eskwela iti pamilyada ken gapu iti ayatna a saanen a mapadasan ti rigat iti garden, inkagumaan ni Karylle P. Piaga, 23-anyos nga agturpos iti kolehiyo.
“Kayat ko nga uray kaskas-ano ket adda ti makaturpos kadakami nga agkakabsat. Nagbalin nga inspirasyon ko ti rigat iti garden ken makipordiya nangruna ta pabaliw-baliw ti presyo ti nateng. Kayat ko metlaeng a subadan ti sakripisyo dagiti nagannakko nangruna ta bumaket ken lumakaydan.”
Karylle Piaga
Saan laeng a nagturpos ni Karylle nu di ket nakaawat pay iti award kas cum laude iti Benguet State University idiay La Trinidad, Benguet iti kursona a Bachelor of Science in Development Communication.
“Ti first ken second choice ko nga kurso ket Agri-Biosystem and Engineering ken Social Studies ngem saannak a nakapasa iti admission test isunga BS Devcom ti inalak a kurso. Nupay kasta, maragsakannak latta ta nakaturposak iti kolehiyo.”
Karylle Piaga
Ni Karylle ket anak da Mr. Joseph E. Piaga ken Felisa P. Piaga, agpada a mannalon manipud Cotcot, Bangao, Buguias, Benguet.
Nagturpos daytoy idiay Cotcot – Talabis Elementary School idi 2014 ken nagturpos idiay Bangao National High School kas valedictorian idi 2020.
Iti baet ti kinakurang ti pinansiyal, nagtuloy latta daytoy a nagadal iti kolehiyo babaen iti tulong ti maysa nga organisasyon a nang-sponsor kadagiti dadduma a materyales a kinasapulanna iti panagadalna.
“Ti challenges a napadasak ket ti pinansiyal gapu ta kasapulan nga agbayad para iti boarding ken kasapulan nga aggatang ti materyales para iti pagadalan kas ti laptop. Gapu iti Cordillera Connection, adda ti nagsponsors kadagiti usarek kas ti laptop agingga second year college.”
Karylle Piaga
Nagserbi pay ni Karylle kas student assistant ti Benguet State University ken nagserbi kas cashier ken bagger iti maysa a korean store bayat ti panagadalna.
Malaksid iti pinansiyal, inaklonna a nagbalin metlaeng a karit dagiti restriction nga intunda ti COVID-19 pandemic.
Narigatan daytoy iti nagbalin a transition ti edukasyon partikular ti online class a maysa kadagiti rason nu apay a nakaala iti 75 a grado.
Iti baet daytoy, ad-adda a pimmintas ti performance ni Karylle idi naipatungpalen ti face-to-face classes gapu ta namintinarnan ti nangato a grado.
Naragsak nga imbinglayna nga isuna ken dagiti innem a barkadana ket nagturposda kas cum laude.
“Saanko ekspektaren a maysa ak kadagiti adda iti listaan dagiti maipaayan iti latin honors. Agmixed ti emotion, naragsak ken makasangsangit kasi nagbunga amin dagiti rigrigat ken dagiti aldaw a saan a naturturogan.”
Karylle Piaga
Impeksa ni Karylle a maysa metlaeng kadagiti nagbalin nga inspirasyonna ket ti kanayon nga ibagbaga dagiti nagannakna nga aggaget nga agadal gapu ta daytoy laeng ti maipatawidda kenkuana.
Nangipaay met daytoy ti mensahe kadagiti estudyante nangruna kadagiti padana a nangpadas iti narigat a panagbiag nga ikonsiderada ti financial capabilities dagiti nagannakda nu agala dagitoy iti kurso.
“Sakbay tayo nga agpili iti kurso, kitaen tayo pay ti financial capabilities ti parents tayo. Saan tayo koma nga ipabiang amin kadakuada nu di ket kitaen tayo nu kasano tayo a makatulong.”
Karylle Piaga
Iti agdama ket planona a sumrek iti government agencies tapno makapagserbi iti komunidad.
