Patyen ti tubo ti Kalinga a ni Herjie Bacyadan a makaiyawid daytoy ti medalya iti mapadpadaanan a Paris Olympics 2024.
Daytoy ket kalpasan a nangabak ken nakwalipikar kontra iti nagbalin a kalabanna a ni Maryelis Yriza ti Valenzuela babaen iti unanimous decision iti quarterfinals iti women’s 75 kilogram division iti naipatungpal a 2nd World Boxing Qualification Tournament sadiay Bangkok, Thailand idi laeng kalman.
Iti exclusive interview ti Bombo Radyo iti baente nueve-anyos, kinunana a 101 percent a nakasagana daytoy ken dakkel ti panagtalekna iti kabaelanna a nasayaat a makiranget daytoy iti Paris Olympics.
Dinakamat ti yCordilleran athlete a dakkel a karit kenkuana ti “pressure” manipod kadagiti nagduduma a tattao nga agtaltalek iti kabaelanna.
Ngem nupay kasta, impasigurado ni Bacyadan nga aramidenna ti kabaelanna iti laban daytoy gaputa saanna kayat a mapaay dagitoy nangruna dagiti yKalinga a numero uno a sumopsuporta kenkuana ken kasta met dagiti Filipino fans daytoy.
Imbinglay pay ti boksingero a ti agbalbalin nga inspirasionna iti tunggal laban daytoy ket ti pamilyana, ti partnerna, dagiti ka-tribu daytoy idiay Kalinga ken dagiti amin a Pilipino nga agtaltalek iti talentona.
Aklonen ni Bacyadan a rumbeng nga agsana daytoy a nasayaat gaputa agbalin a kalabanna dagiti beterano a boksingero.
Iti agdama, nakapokus ken agtultuloy ti nainget a panagsanayna nangruna iti endurance daytoy.
Kabayatanna, ni Bacyadan ti maikasangapulo ket lima a Pinoy Athlete ken maikalima a Pinoy boxer a nakwalipikar iti Paris Olympics nu sadinno makaduana da Carlo Paalam, Nesthy Petecio, Eumir Marcial, ken Aira Villegas.
Maipalagip a ni Bacyadan ti kaunaan a boksingero manipod Norte a nakauneg iti Paris Olympics.
