Impakaammo ni Department of the Interior and Local Governemnt Secretary Jonvic Remulla nga agkidkidaw ni sigud nga Ako Bicol party-list Representative Elizaldy “Zaldy” Co iti panakipag-dialogue daytoy iti gobyerno.
Sigun kenni Remulla, nangipatulod ni Co iti feelers babaen kadagiti grupo ti papadi a maatap a nagreach out iti kabsatna a ni Ombudsman Jesus Crispin Remulla.
Nupay kasta, kinuna ti DILG secretary a saanna a kabisado dagiti papadi a nangipaay iti nasao nga impormasyon ken iti agdama ket saanda pay a naberipikar.
Iti baet dayta,kinunana nga aw-awatenda latta ti impormasyon ken silulukat ti gobyerno a makidayalogo iti sigud a kongresista.
Kagiddan dayta, impetteng ti Remulla a saan nga aramaten ni Co ti gundaway tapno mangaramid iti bribery tapno makalusot daytoy kadagiti sangsangwenna a kaso.
Maipalagip a ni Co ket nagturong iti ballasiw-taaw iti katengngaan iti imbestigasyon kadagiti naanomalyan a flood control projects nu sadino, maysa daytoy kadagiti maitudtudo nga adda ti pakainaiganna.
Adun a daras a nakiddaw ti panagsublina iti Pilipinas ngem agingga iti agdama ket saan pay a nakasangpet ngem nangipablaak kadagiti video a naglaon kadagiti impormasyon mainaig iti nasao nga isyu.
