Impanamnama ti Department of Health (DOH) a maipaay ti Zero Balance Billing kadagiti pasyente a nadangran kabayatan ti naipatungpal a nationwide anti-corruption rally idi Domingo.
Sigun kenni Health Secretary Teodoro Herbosa, daytoy ket kas panagtulnog iti pammilin ni President Ferdinand Marcos Jr. nga ipasiguradoda a maipaayan dagiti Pilipino iti napartak ken dekalidad a serbisyo medikal.
Maibasar iti datos manipod iti nasao nga ahensya, dumanon iti 48 nga indibidwal ti naipaagas sadiay DOH-Jose R. Reyes Memorial Medical Center kalpasan a nadangran dagitoy iti nasao a tignay-protesta pakairamanan dagiti daduma a kameng iti pulisya.
Sumagmamano a dunor a nasagrap dagiti pasyente ti laceration ken daduma pay a klase iti sugat iti nagduduma a paset iti bagi dagitoy kas iti saka, mata, ulo, takyag ken daduma pay.
Malaksid iti dayta, adda met ti pimmusay a maysa a lalaki gapu iti maatap a panakabagsol daytoy ngem agingga iti agdama ket saan pay a nabigbig.
