Isaksakad ni Baguio City Councilor Edison Bilog ti maysa nga ordinansa a Zero Billing Support and Medical Financial Assistance Program (ZBSP) tapno sungbatan ti nabatbati a hospital bills dagiti kwalipikado a residente iti siudad ti Baguio a naadmit iti Baguio General Hospital and Medical Center wenno BGHMC.
Panggep iti programa a maipasigurado nga awanen ti pasiente a madischarge a saan pay a nakabayad iti gastos kalpasan nga aramatenna ti PhilHealth, government assistance, hospital subsidies, ken dadduma pay nga insurance coverage.
Saklaw iti ZBSP ti mabayadan iti agas, laboratory, operasion, emergency ken intensive care services, ken dadduma pay a kasapulan a medical procedures. Karaman metlaeng iti ordinansa dagiti indigent, financially incapable, ken emergency wenno catastrophic cases a sinertipikaran iti CSWDO wenno social service units iti ospital.
Maipayaan iti prayoridad iti programa dagiti nakukurapay a pasiente ken nakaro a kondision nga addaan iti nangato a nabatbati a hospital bills.
Naaprobran iti umuna a pannakaibasa iti Baguio City Council idi Mayo 11, 2026 ti singasing nga ordinansa ken agdama nga ad-adalen iti maseknan a komite.
