BAGUIO CITY – Nailista ti Baguio City Police Office ti zero crime incident bayat ti Grand Street Dance Parade ken Grand Floral Float Parade, dagiti dua a highlights ti Panagbenga Festival a naangay idi Pebrero 22 ken Pebrero 23.
Ti natalna ken naannayas a pannakaipatungpal dagiti dua a dadakkel a parada ket resulta ti nainget a panagplano, koordinasyon ken multi-sector collaboration dagiti kameng ti Baguio City Police Office.
Nakatulong metlaeng dagiti palagip ken pakdaarda iti publiko babaen iti social media ken panagrekoreda.
Malaksid iti presensiya dagiti kameng ti Baguio City Police Office, timmulong metlaeng dagiti police personnel manipud iti Police Regional Office-Cordillera iti panangidaulo ni PBGEN David Peredo.
Sigun met kenni PCOL. Ruel Tagel, dadaulo ti BCPO, ti naballigi a pannakaipatungpal dagiti dadakkel a parada ket gapu metlaeng iti koordinasyon ti publiko a nagtulnog kadagiti nairuar a pagalagadan.
