BAGUIO CITY – Naipangato iti kaso a frustrated homicide ti maipila kontra iti suspek a nangbagbagsol iti pastor a padana a pasahero iti jeep sadiay La Trinidad, Benguet.
Immunan a naipila ti kaso a multiple physical injuries kontra kenni Marverick Flores Palabay, 29-anyos, baro, construction worker, tubo ti Pugo, La Union ken residente ti Tandang Sora St, Brgy. Camdas, Baguio City.
Gapu daytoy iti panagbagbagsolna iti biktima a pastor nga immunan a nabigbig a ni Julian Pecsoy Mangida, 52- anyos, naasawaan, tubo ti Santiago, Isabela ken residente ti Western Buyagan, La Trinidad, Benguet.
Iti imbestigasion dagiti otoridad, naduktalan a namin-ado a daras a binagsol ti suspkek ti biktima iti saan a masinunuo a rason idi bumaba koma daytoy iti sangwanan ti maysa a pagadalan sadiay Buyagan, La Trinidad, Benguet.
Naklaat dagiti pasahero iti kilaat nga inaramid ti suspek isu’t gapuna a kinomprontarda a dagus daytoy ken inlisida ti biktima manipud iti ima ti suspek.
Kalpasan ti insidente, pinadas ti suspek nga aglibas ngem nalapdan a dagos daytoy dagiti pasahero agingga a kinemmeg dagiti otoridad.
Nakumpiskar manipud kenkuana ti 9-inches ti kaatidogna a kutsilyo ken naiturong metten daytoy iti pagbaludan.
Sigun met kenni PLT. Bernico Tiwtiwen, imbestigador ti insidente; makitkita nga adda ti personal a parikut ti suspek a rason ti panangbagsolna iti biktima nga itan ket agpatpataming iti pagagasan.
