Inyarig ni Mike Cabangon,dadaulo iti Kilusang Mayo Uno-Cordillera a kina-ipokrito ti kinuna iti Department of Trade and Industry (DTI) nga umdasen ti ₱500 para iti Noche Buena iti uppat a miembro iti pamilya.
Sigun kenni Cabangon, mangipakita daytoy a saan nga ammo dagiti adda iti nangangato a posisyon iti gobyerno ti pudno a kasasaad iti mayorya ken dagiti marigrigat.
Malaksid iti dayta, patienna a kinuna ti nasao nga opisina nga umdasen ti lima-gasut a piso tapno panunuten dagiti umili nga umdasen dagiti nababa a sweldoda nga igatang iti idasarda para iti Noche Buena ken tapno saandan nga agreklamo wenno agkiddaw iti nangatngato a sweldo.
Inlawlawag ni Cabangon nga adda ti kinaagpayso nga umdas ti lima-gasut a piso a pang Noche Buena ngem nu ar-arigin ket kurang pay ti ₱470 a mapaspastrekan dagiti mangmangged tunggal aldaw para iti daytoy.
Malaksid iti dayta,nupay umdas ti lima-gasut a paggatang iti handa iti Noche Buena,inkalintegan ti nasao nga opisyal a kasapulan ti mayorya nga ikonsidera dagiti pagkasapulan dagitoy kadagiti sumaruno nga aldaw.
Maipalagip nga itay nabiit ket inlawlawag iti DTI nga umdasen ti ₱500 para iti Noche Buena kadagiti uppat a miembro iti pamilya.
Nakaawat daytoy iti nagduduma a reaksyon manipod kadagiti umili nu sadino, adu ti nagbabalaw iti daytoy.//Bombo Rob Dominguez
