BAGUIO CITY – Maan-anop ita ti maysa a mannalon a nangpaltog iti padana met laeng a mannalon sadsiay Silet, San Juan, Abra idi rabii.
Nabigbig daytoy a ni Randy Barbasa Bayubay, addaan iti legal nga edad, naasawaan, bayat a ti biktima ket nabigbig a ni Joel Barbasa Ladicho, 42, naasawaan, ken residente iti nasao a lugar.
Maibasar iti inisyal nga imbestigasyon, nagiinom ti biktima ken dagiti kakadwana, pakairamanan ti suspek idi timmaud ti nabara nga argumento iti nagbaetan ti biktima ken ti suspek.
Nagawid ti biktima ngem sinurot daytoy ti suspek ket nagsinnubangda manen ngem inanawa dagitoy dagiti maseknan a residente.
Pimmanaw ti suspek bayat a nagsubli ti biktima iti tersina tapnu alaenna ti tsinelas daytoy idi killaat a pinaltogan daytoy ti suspek babaen iti saan a masinunuo ti kalibrena a paltog a nangitunda iti ipupusay daytoy.
Dagus a naglibas ti suspek kalpasan ti insidente.
Kabayatanna, matamtaming iti ospital ti maysa a sales representative kalpasan a pinaltogan ti maysa a mannalon sadiay Barangay Udangan, La Paz, Abra idi rabii.
Nabigbig ti biktima a ni Leandro Blanza Dosdos, 26, single, bayat a ti suspek ket ni Arnel Calayoan Blanza, 43, naasawaan, agpada a residente ti nasao a lugar.
Naamuan a rumuar kuman ti biktima iti balay ti maysa a managan Allog idi pinaltogan daytoy ti suspek babaen iti kalibre 45 a pistol.
Nagsagrap ti biktima iti tama ti paltog iti kanawan a luppona ken naitaray iti Abra Provincial Hospital.
Naamuan met a sigud nga apa ti rason ti panangpaltog ti suspek iti biktima.
Nakemmeg ti suspek ken maisagsagana itan ti kaso kontra kenkuana.
