![](https://img.bomboradyo.com/baguio/2021/08/POLICE-REPORT-1.jpg)
BAGUIO CITY – Pimmusay ti maysa nga indibidual bayat nga agpatpataming paylaeng iti pagagasan ti maysa pay nga indibidual kalpasan a nadungpar dagitoy ti lugan bayat ti panagballasiwda iti pedestrian lane sadiay Cariño Street, ditoy siyudad ti Baguio idi rabii.
Nabigbig ti driver ti lugan a ni Richard Afangka, 45-anyos, naasawaan a residente ti Honeymoon Road, Baguio City.
Nabigbig met dagiti biktima a da Manuel Zoleta Barredo, 81-anyos, residente ti Crystal Dale Subdivision, Bakakeng Central, Baguio City ken Rondie Timbang Guevarra, 34-anyos, naasawaan, bouncer ken residente ti Hamada Street, MRR Queen of Peace, Baguio City.
Maibasar iti report ti pulisya, nagtaud iti deppaar ti Rizal ti lugan nga imanmaneho ni Afangka ken paturong daytoy iti deppaar ti Legarda wenno Yandoc Street.
Nupay kasta, aksidente a nadungparna dagiti dua a biktima a manarimaan nga agbalballasiw iti pedestrian lane iti Cariño Street.
Dagus met a naitaray dagiti dua iti ospital ngem kalpasan ti sumagmamano nga oras ket naideklara a pimmusay ni Barredo bayat ti panakataming daytoy.
Dagus met nga nakumpiskar ti driver’s license, OR/CR ti lugan ni Afangka ken temporaryo na-impound ti nasao a lugan bayat ti panakaisayangkat ti naun-uneg nga imbestigasyon seknan iti napasamak nga insidente.