![](https://img.bomboradyo.com/baguio/2020/02/Panagbenga2020_-2.png)
BAGUIO CITY – Agtalek ti Baguio Flower Festival Foundation, Inc. (BFFFI) a siento porsiento a matuloy ti naituding a pannakaipatungpal dagiti highlights ti Panagbenga Festival iti maudi a paset ti agdama a bulan.
Iti interbyu ti Bombo Radyo-Baguio ken ni Andrew Pinero, media officer ti BFFFI, kinunana nga awan ti aniaman a sinyales a mangipasimudaag iti saan manen a pannakaituloy dagiti aktibidad ti Panagbenga.
Kinunana nga agtultuloy ti panagsagana ti BFFFI ken ti lokal a gobierno ken agtultuloy ti aplikasion kadagiti entries iti Grand Float Parade.
Dinakamat ni Pinero nga adda dagiti baro a kompania a makipaset iti Float Parade.
Maisagsaganan ti Opening Parade ti aktibidad a maisayangkat inton Marso 21.
Maangay met ti Grand Street Dance Parade inton Marso 28, ti Grand Float Parade inton Marso 29 ken ti Session Road in Bloom inton Marso 30 aginggat Abril 5.