BAGUIO CITY – Naka-aramid iti pakasaritaan iti tay-ak ti ultra running community iti rehion Cordillera ti tallo nga Igorot ultra-runners kalpasan a nakompletoda ti 100-kilometer ultra-road run manipud Benguet agingga sadiay Ifugao.
Iti interview ti Bombo Radyo Baguio, impannakkel ni Dennis Lee a nabaelanda a tinaray ti dua a highest points iti Philippine Highway System, partikular iti munisipyo ti Atok sadiay Benguet ken iti munisipyo ti Tinoc sadiay Ifugao.
Kinunana a nangrugida iti deppaar ti kapitolyo sadiay La Trinidad, Benguet ken dimmalanda sadiay Atok sakbayda a tinaray ti 12 a kilometro a dalan paturong iti kabaruan a highest point sadiay Eheb, Tinoc, Ifugao.
Sigun kenkuana, nakompletoda ti nasao a ultra-road run iti uneg ti 19 nga oras.
Naamuan a ni Lee, kadwana da Jessica Amos ken Isabel Quipse ti kaunaan a trio wenno grupo dagiti atleta a nangrikos iti dua a highest points iti Cordillera babaen iti ultra-road run bayat nga adda met dagiti dadduma a grupo a nagaramat iti bisikleta.
Impasigurado met ni Lee a naikoordinar kadagiti maseknan a lokal a gobyerno ti aktibidad dagitoy.
Mangnamnama pay daytoy a kadagiti masungad a bulan ket adda dagiti maisayangkat a kompetisyon tapnu adda met ti output ti panagsansanay dagitoy iti ultra marathon.
