Pinapigsa pay ti gobyerno ti pagilian a Pilipinas ti panagsaganana para iti posible nga epekto ti “Super El Niño” partikular iti posible a panagkurang ti danum ken nakaro a kalgaw.
Sigun kenni Undersecretary Claire Castro, nagsarita dagiti maseknan nga ahensya idi Mayo 25 tapno pagsaganaan ti nasao sitwasyon.
Nangisaganan ti National Irrigation Administration (NIA) kadagiti mitigation plans pakairamanan ti panangaramat iti groundwater maps, maintenance, ken rehabilitation ti solar-powered pump irrigation system, ken panangimuntar kadagiti mobile solar pumps kadagiti water-stressed areas iti pagilian.
Agsagsagana metlaeng ti Department of Environment and Natural Resources (DENR) iti water security, forest fire prevention ken energy conservation, bayat nga ad-adalen met ti Department of Agriculture (DA) dagiti irrigation systems ken drought-resistant crops.
Nakasagana metten dagiti financial assistance a maipaay kadagiti mannalon ken mangngalap iti kanito a kumaro ti sitwasyon.
Kanayonanna, agsagsagana metten ti Department of Energy (DOE) para iti posible a power interruptions.
