Nagkiddaw ti Bureau of Customs (BOC) iti lookout bulletin order manipud iti Department of Justice (DOJ) kontra iti 13 nga indibidual a sumangsango iti criminal complaints seknan iti mapapati nga agricultural smuggling.
Panggep daytoy a mamonitor ti internation travel dagitoy bayat a mannarimaan ti imbestigasyon dagiti otoridad.
Karaman kadagiti nabigbig ket ti makinkukua ken mangibagbagi iti importer, maysa a customs broker, 9 opisyales ti Bureau of Customs (BOC) officials, ken empleyado ti maatap a konektado kadagiti shipments.
Sigun iti BOC, posible pay a manayunan ti listaan nu adda dagiti maduktalanda a karaman iti nasao a krimen.
Nagtaud ti nasao nga kaso iti shipments a sinmangpet iti pagilian idi Hulyo 2025 no sadino naideklara daytoy kas “chicken lollipops” ngem naglaon met gayan iti agarup 15,000 a sako ti puting sibuyas ken 2,164 a kahon iti karot.
Awan metlaeng ti naiparang a sanitary ken phytosanitary import clearance dagiti nasao a produkto.
Impetteng met ti Bureau of Immigration (BI) a ti nasao a lookout order ket para iti travel monitoring ken saan nga otomatiko a manglapped iti maysa nga indibidual a rummuar iti pagilian a Pilipinas.
Kabayatanna, impetteng met ti BOC nga aramatenda amin a kabaelanda kontra iti asinoman a maduktalan a karaman iti nasao nga smuggling scheme.
