Impetteng ti Department of Justice a saan a makaapektar ti naipila a kaso a grave threat kontra kenni VP Sara Duterte iti mannarimaan a trial idiay senado.
Sigun kenni Justice Spokesperson Atty. Polo Martinez, impettengna a sabali ti proseso ti kaso ni VP Sara iti senado.
Inlawlawag daytoy a ti mannarimaan a trial ket saklaw ti lehislatura nga idadauloan dagiti senator judges bayat a ti DOJ met ti makinsaklaw iti kriminal a kaso.
Maipalagip a pormal a pinilaan ti Department of Justice ni Vice President Sara Duterte iti grave threat iti Regional Trial Court idiay Quezon City.
Ti nasao a kaso ket mainaig iti insawang ti bise presidente a pangta iti biyag da President Ferdinand Marcos, Jr., First Lady Liza Araneta-Marcos, ken sigud a House of Representative Speaker Martin Romualdez.
Iti agdama, addan iti hurisdiksyon ti korte ti kaso a grave threat kontra kenni VP Sara Duterte bayat a ti ‘inciting to sedition complaint’ ket immunan nga imbasura ti prosekusyon gapu iti kinakurang ti ebidensya.//bombokaren.c.sapirao
