BAGUIO CITY – Karkaro pay a limmam-ek ti temperatura ditoy siudad ti Baguio, no sadino ket nairekord itay agsapa ti 11.5 degrees celsius kas kalammiisan a temperatura.
Gapu iti daytoy ket nagpalagip manen ti Department of Health-Cordillera iti publiko nangruna kadagiti agturong iti siudad ti Baguio ken iti probinsia ti Benguet nga agisuot dagitoy iti napupuskol a badbado.
Inlawlawag ti ahensia a daytoy ket tapno maliklikan dagiti sakit kas iti panateng, uyek, ken hypothermia a kadawyan a mapaspasaran nu nalam-ek ti tiempo.
Posible nga ad-adda pay a lumammiis ti temperatura iti siudad kasta metten iti probinsia ti Benguet partikular sadiay Atok ken Mt. Pulag iti ili ti Kabayan.
Maipalagip a ti kababaan a temperatura a nailista iti pakasaritaan ti Baguio City ket nairekord idi January 19, 1961 a dumanon iti 6.3 degrees celcius.
