BAGUIO CITY – Nagpositibo iti COVID-19 dagiti 11 nga indibidual manipud iti City Council wenno iti lokal a konseho ti siudad ti Baguio.
Inwaragawag daytoy ni Mayor Benjamin Magalong nupay saanna nga imbinglay ti pakabigbigan dagiti nasao nga indibidual.
Kinunana a temporaryo a mairikep ti lokal a konseho iti las-ud ti makalawas para iti panakaipatungpal dagiti preventive measures kas iti disinfection ken isolation dagiti personnel sadiay.
Nakasaritana metten ni Vice Mayor Faustino Olowan para iti panakaipatungpal ti work-from-home dagiti konsehal ken dadduma pay nga staff iti lokal a konseho.
Dinakamatna pay a naipasidong metten dagiti dadduma pay nga staff ti lokal a konseho iti antigen testing.
Impasigurado pay ni Mayor Magalong ti panakaipaay ti medical assistance ken dadduma pay a tulong nangruna kadagiti immunan a nagpositibo ti COVID-19.
