BAGUIO CITY – Natalgeden ti kasasaad dagiti sangapulo ket maysa nga indibidual a nadangran iti panakatnag ti naglugananda a Ford Fiera sadiay Showeg, Bashoy, Kabayan, Benguet idi malem kalman.
Maibasar iti report ti Kabayan Municipal Police Station, pasalog iti kalsada ti lugan nga addaan plaka nga AAN 331 idi naikadlis daytoy agingga a natnag iti rangkis nga addaan kauneg nga agarup nasurok 30 a metro.
Dagus met a nagresponde dagiti volunteers ken dagiti otoridad para iti rescue operation kadagiti pasahero ti lugan.
Naitaray iti Dennis Molintas District Hospital dagiti amin a pasahero kalpasan a nagsagrapda ti dunor ngem nakaruaren ti tallo kadagitoy bayat nga agtaltalinaed iti pagagasan dagiti walo a dadduma pay para iti panagpaimbag dagitoy.
