![](https://img.bomboradyo.com/baguio/2021/04/City-Hall-Baguio-1-2.jpg)
BAGUIO CITY – Narambakan idi Miyerkoles, September 1 ti maika-112 a Charter Day ti Baguio City nga addaan ti tema a “Moving Forward as One”.
Iti mensahe ni Mayor Benjamin Magalong, kinunana a naipakita ti siudad no anya dagiti mabalin a maaramidan daytoy babaen iti panagkaykaysa ken kooperasyon.
Sigun kenkuana, ti Baguio Bayanihan ti agbalin a giya ti siudad iti panakatungpal ti kampanya a panakaisubli ti Baguio iti napimpintas pay a sitwasyon manipud iti epekto ti agdama a pandemya.
Iti met mensahe ti kangrunaan a sangaili a ni Department of Tourism Secretary Bernadette Romulo-Puyat, kinunana a ti Baguio City ti provider wenno nangipapaay iti namnama ken inspirasyon iti panakaipaay ti panagpadayaw iti pakasaritana, kultura ken tradisyon babaen kadagiti innovative ken natalged a wagas kagiddan ti pananglaban ti sangalubongan iti agdama a pandemya gapu iti COVID-19.
Kinunana a babaen iti epektibo a panangimplementar iti health and safety protocols ken iti napintas a panakaimaton dagiti umili ken dagiti sangaili ket naipalubos ti nasapsapa a panaglukat ti siudad iti turismo ken ekonomiya no idilig iti dadduma a destinasyon iti pagilian.
Binigbigna pay ti agtultuloy a panangiyusuat ti siudad kadagiti programa ken proyekto a mangtartarigagay iti panakapasayaat ti istruktura ti siudad ken iti biag dagiti umili daytoy.
Paset pay ti aktibidad ti panakabigbig dagiti lima nga outstanding citizens ti siudad a sinaruno ti panakaiparang iti publiko ti kampanya a naawagan ti #BreatheBaguio ken ti Urban Heritage Development Plan.
Imbinglay met ni Mayor Magalong ti ababa nga state of the city address daytoy ken ti panakaiparang metlaeng ti mock-up ti urban mobility concept a naimuntar iti Upper Session Road.