BAGUIO CITY – Marambakan ita nga aldaw iti simple a wagas ti 120th Foundation Day ti Benguet.
Sigun ken ni Governor Melchor Diclas, marugian ti simple a selebrasion ti Benguet Day ita a tawen babaen iti kararag ken ritual.
Mapadayawan metlaeng dagiti nangabak iti beautification road projects ti probinsia.
Maipatungpal met inton malem ti “lubon” a maysa a ritwal dagiti Kankana-ey.
Maparti ti maysa a lalaki ken maysa a babai a baboy ken idaluan dagiti panglakayen ti kararag para iti kinatalged dagiti umili ken tapno saanen nga agwaras ti COVID-19.
Maipalagip a nakanselar ti selebrasyon ti Adivay Festival ita a tawen gapu iti mapaspasaran a pandemya.
Immunan nga indeklara ti Malakanyang nga special non-working holiday ti November 23 sadiay Benguet para iti panakarambak ti Foundation Day ti probinsia.
