Nawayawayaanen dagiti 126 a persons deprived of liberty (PDLs) iti pagilian kagiddan ti pannarambak iti mai-126th a Philippine Independence Day ita nga aldaw.
Sigun iti Bureau of Corrections (BuCor), pakabuklanen iti 14,324 a balud ti nawayawayaan bayat ti adiministrasyon ni President Marcos Jr.
Pakabuklan iti innem a pulo ket maysa a balud manipud maximum security camp, iti medium security camp, ken iti reception ken diagnostic center iti New Bilibid Prison idiay Muntinlupa City ti nawayawayaan itay laeng nabiit.
Malaksid iti dayta, nawayawayaan dagiti dua pulo ket dua a balud manipud Davao Prison ken Penal Farm idiay Davao del Norte, sangapulo ket innem manipud iti Correctional Institution for Women idiay Mandaluyong City, sangapulo manipud San Ramon Prison ken Penal Farm idiay Zamboanga City, agpada a walo manipud Leyte Regional Prison idiay Abuyog ken iti Sablayan Prison ken Penal Farm idiay Occidental Mindoro ken maysa manipud Iwahig Prison ken Penal Farm idiay Palawan.
Gapu iti dayta, kinuna ni Bureau of Corrections (BuCor) Director General Gregorio Catapang Jr., a manamnama nga ad-adu pay ti mawayawayaan a balud la ketdi agtungpal ken agbalbaliw dagitoy.
Impettengna a saan nga amin ket naipaay iti maikadua a tsansa isu’t gapuna nga inyu-unayna a pagbalinen dagiti balud ti tsansa a napateg ken saanda daytoy a sayangen.
Kabayatanna, sinilibraran ti Bureau of Corrections (BuCor) ti independence day no sadino addan dagitoy iti tema a “Kalayaan, Kinabukasan, Kasaysayan” (Freedom, Future, History).//Rose
