BAGUIO CITY – Nakumpiskar ti 14 a puon ti marijuana a naimula iti 13 a masetera ken nagduduma nga illegal drug paraphernalia manipud iti pagtaengan ti maysa a lalaki a senior citizen sadiay Santo Rosario Valley Barangay ditoy siudad ti Baguio idi kalman.
Iti report ti PDEA-Cordillera, nabigbig ti nasao a senior citizen a ni Donato Sajonas, 60-anyos, maysa a high value individual ken sigud a balud iti Bilibid Prison.
Naisayangkat ti operasyon iti bileg ti search warrant a nagresulta iti panakadiskobre dagiti nasao a kontrabando manipud iti nagduduma a paset ti balay ti senior citizen, partikular iti beranda, iti baba ti tawa ken iti sala.
Nakumpiskar pay manipud iti balay ti senior citizen ti napagango a bulong ti marijuana, tallo nga improvised tooter ken maysa a weighing scale.
Inkalintegan met ti nasao a senior citizen nga ar-aramatenna kas agas dagiti nasao a marijuana.
Nupay kasta, tiniliw latta daytoy dagiti otoridad gapu iti panaglabsingna iti linteg nga RA 9165 wenno ti Comprehensive Dangerous Drugs Act of 2002.
Immunan nga inyunay-unay ti PDEA-Cordillera a maiparit latta ti panagmula ken panag-usar ti marijuana gaputa awan paylaeng ti linteg a mangipalpalubos iti medical use ti nasao a mula. //GCBalegan/Janice Denis
